मधेसखबर
वीरगन्ज,१४ बैशाख : वीरगन्जको गण्डक स्थित नेपाल मेडिसिटी बयोधा हस्पिटलले उपचारका बहानमा बिरामी र सेवाग्राहीलाई ठगेको घटना प्रकाशमा आएको छ ।हस्पिटलले उपचारको बिलमा उपचार नै नभएको शीर्षकमा समेत शुल्क जोडेर ठगी गरेको उक्त अअस्पतालमा उपचारका क्रममा मृत्यु भएका एक बिरामीका आफन्तहरुको आरोप छ ।
मोटरसाइकल दुर्घटनामा परि गम्भिर घाइते भएका बाराको जितपुर सिमरा उपमहानगरपालिका २ का २७ वर्षिय विजय कुमार बरइलाई गत मंगलबार राति १२ बजे नेपाल मेडिसिटी बयोधा हस्पिटलमा भर्ना गरिएको थियो । तर उपचारका क्रममा उनको बुधबार बिहान ११ बजे मृत्यु भयो ।
बरइको मृत्युपछि शव बुझने क्रममा आफन्तलाई हस्पिटलले ४ लाख ८० हजार रुपैयाको बिल थमाएको थियो ।तर आफन्तले बीलमा उल्लेख शुल्को शीर्षकहरु शंकास्पद रहेको भन्दै विवाद गरेपछि अस्पतालले ३ लाख १० हजार रुपैया मात्रै लिएर शव आफन्तको जिम्मा लगायो ।
तर उक्त बिलमा एउटै उपचारको पनि अलग अलग शीर्षक राखेर रकम जोडिएको मृतकका आफन्तहरुको गुनासो छ । अस्पतालको उक्त ठगी प्रकरण बारे मृतकका आफन्तले बिहीबार पत्रकार सम्मेलन गरेर सार्वजनिक गरेका छन् ।
पत्रकार सम्मेलनमा मृतक बरईका दाजु अजय कुमार चौरसियाले नेपाल मेडिसिटी बयोधा हस्पिटलले बिरामीको उपचारभन्दा पनि व्यपारी बनेर बिरामीलाई ठग्दै आएको आरोप लगाए । बरईको उपचारका क्रममा टाँउको शल्यकृया गरेबापत अस्पतालले अनेक शीर्षकको शुल्क जोडेर रकम असुलेको चौरसियाको आरोप छ ।
चौरसियाका अनुसार , अस्पतालले दिएको बिलमा सर्जन चार्ज (अप्रेशन गर्ने डाक्टरको शुल्क) १ लाख ९२ हजार ५ सय र अप्रेशन चार्ज १ लाख ५ हजार रुपैया उल्लेखछ । यस्तै एनेस्थेसिया चार्ज ( शल्यकृया पुर्व बिरामीलाई अचेत बनाउने शुल्क ) ५२ हजार र प्रोसेजर चार्ज ( शल्यकृयाको तयारी शुल्क ) २० हजार रुपैया पनि बीलमा उल्लेख छ ।
मृतक बरइका दाजु चौरसियाले प्रश्न गर्दै भने,‘ सर्जन चार्ज र अप्रेशन चार्ज अलग अलग किन ? अप्रेशन डाक्टरले नै गरेका हुन् , त्यसोभए सर्जन चार्ज छुट्टै लिनु कहाँ सम्मको जायज हो ? यो त सरासर लुटतन्त्र हो ।
अप्रेशन गर्नुपूर्व बिरामीलाई अचेत पार्न एनेस्थेसिया चार्ज बापत पनि छुटटै ५२ हजार र अप्रेशन गर्ने डाक्टरले गर्नु पर्ने तयारी ( प्रोसेजेर चार्ज बापत पनि छुट्टै २० हजार लिएकोले यो पनि ठगी नै भएको चौरसियाले बताए ।यसका अतिरिक्त भेन्टिलेटर चार्ज प्रतिदिनको ४ हजार ८ सय लेखिएपनि अस्पतालले २४ घण्टा भेन्टिलेटरमा राखेबापत दोब्बर शुल्क लिएको चौरसियाले बताए ।
पत्रकार सम्मेलनमा मृतकका दाजु चौरसियाले नेपाल मेडिसिटी बयोधा हस्पिटल अकुत सम्पति कमाएकाहरुले मात्रै उपचार गर्ने अस्पताल भएको आरोप लगाए । उनले यो अस्पताल उपचार सेवाका लागि नभइ व्यपारका लागि मात्र खोलिएको अस्पताल भएको आरोपपनि लगाए । चौरसियाले भने,‘ बीलमा अनावश्यक चार्ज जोडेको गुनासो लिएर अस्पतालका प्रशासन प्रमुखकोमा पुग्दा उल्टै उनले हामी सेवाका लागि होइन व्यपारका लागि अस्पताल खोलेर बसेको जवाफ पो दिए ।
अस्पतालले अप्रेशन चार्ज जोडेर लिएको भएपनि अप्रेशन नै नगरेको आशंका पनि रहेको चौरसियाले बताए । उनले भने,‘ सुरुमा अप्रेशनका लागि भनेर ४८ हजार रुपैयाँको औषधी मगाए , तर अप्रेशनपछि ४० हजारको औषधी त फिर्ता गराइदिए , अब भन्नुस् ८ हजारको मात्रै औषधीले कसरी अप्रेशन भयो होला ? ।
चौरसियाले आफनो भाईको मृत्यु भइसकेको भएपनि अस्पतालले गर्दै आएको ठगीमा अरु बिरामी नफसुन् भनेर सन्देश दिन पत्रकार सम्मेलन गरेको स्पष्ट पारे ।
यता अस्पतालकी मेडिकल सुपरिडेन्टेण्ट (मेसु) डाक्टर स्वेता झाले भने मृतक बरईका आफन्तले लगाएको आरोप निराधार भएको बताइन् । नेपाल मेडिसिटी बयोधा हस्पिटल एकदमै पारदर्शी भएको उनले दाबी गरिन् ।
उनले भनिन्,‘ अरु हस्पिटल जस्तो हामी बिरामी र आफन्तलाई भ्रममा राख्दैनौ , जे जे उपचार भएको हुन्छ बीलमा त्यसको चार्ज स्पष्ट रुपमा लेखेर दिन्छौ , हाम्रो जस्तो पारदर्शी अस्पताल शायदै अरु कुनै होला ।नेपाल मेडिसिटी बयोधा हस्पिटलको उपचार र सेवा सुविधासम्पन्न भएकाले अरु अस्पतालको भन्दा आफुहरुको उपचार शुल्क अरुको भन्दा केहि बढि नै भएको उनले स्वीकारिन् ।
The post वीरगन्जको बयोधा हस्पिटलले उपचारका नाममा लुटीरहेको बिरामीका आफन्तको आरोप appeared first on Madhes Khabar.
प्रतिक्रिया