मधेसखबर
वीरगन्ज,१९चैत : नेकपा एमालेका नेता एंव पूर्वमन्न्त्री महेश बस्नेतले जसपा अध्यक्ष उपेन्द्र यादव तीन वटा टाउको भएको नागको रुप धारण गरेर चुनाव जित्न बारा २ मा आएको टिप्पणी गरेका छन् ।
बैशाख १० मा हुने उपनिर्वाचनमा बारा २ मा जसपाबाट उपेन्द्र यादवले उम्मेदवारी दिने तयारी छ । यादवलाई कांग्रेस र माओवादी केन्द्रले समर्थन गरेका छन् ।
आइतबार वीरगन्जमा आयोजित राष्ट्रिय युवा संघ नेपालको पर्सा जिल्ला स्तरीय भेलालाई सम्बोधन गर्दै एमाले केन्द्रिय सदस्य बस्नेतले भने,‘ जसपा, कांग्रेस र माओवादी केन्द्रका उम्मेदवार उपेन्द्रजी तीन वटा टाँउको भएकोे नागको रुप धारण गरेर फेरि मधेसमा चुनाव लड्न आएका छन् , उनलाई बारा २ का जनताले अवश्य सबक सिकाउनेछन् ।
कुनै जमानामा आफुलाई मधेसको मसिहा नै ठान्ने उपेन्द्र यादवको दलले मधेसमा सत्ता सम्हालेको ६ वर्ष बित्न लाग्दा समेत मधेसको अवस्था झन् झन् दयनिय बन्दै गएको पनि बस्नेतले बताए ।
बस्नेतले भने,‘ मानव विकासको हरेक सुचांकमा मधेस प्रदेश सबै भन्दा पछाडिछ , सबै भन्दा बढि गरिबी मधेसमै छ , खाडीमा जाने पनि सबै भन्दा बढि मधेसकै दाजुभाइ छन् , योसबको जिम्मेवार उपेन्द्र जी र उहाको दल जसपा नैै हो ।
त्यसैकारण मंसिर ४ को निर्वाचनमा सप्तरी २ का जनताले सबक सिकाएर पठाएका उपेन्द्र यादवलार्ई अब बैशाख १० मा बारा २ का जनताले पनि सबक सिकाउने बस्नेतको भनाई छ ।
बारा २ मा राष्ट्रिय स्वतन्त्र पार्टीबाट उम्मेदवार बन्ने रमेश खरेल प्रति कटाक्ष गर्दै बस्नेतले भने,‘ काठमाडौं १ का जनताले हराएका रमेश खरेल जी चुनाव जित्न नयाँ पार्टीको खोल ओढेर मधेसमा आउदैछन, उनलाई बारा २ का मधेसी जनताले पनि राम्रैसंग सबक सिकाएर पठाइदिनेछन् ।
बारा २ मा एमालेले जनताका प्रिय र योग्य उम्मेदवार चयन गर्ने बताउदै बस्नेतले भने,‘ एमालेबाट को व्याक्ति उम्मेदवार बन्छ भन्ने कुराले त्यति महत्व राख्दैन , तर म ठोकुवा गरेर भन्छु बारा २ मा एमालेले जित्छ जित्छ ।
राष्ट्रिय राजनीतिको प्रसंगमा बोल्दै बस्नेतले अहिले राष्ट्रियता र एमालेका विरुद्ध ११ दल एकठाँउमा उभिएको आरोप लगाए । यद्यपि ११ दलको गठबन्धनलाई पहिलो गाँसमै ढुंगा परेको पनि उनले बताए ।
बस्नेतले भने,‘ सरकार विस्तारमा रोजेको मन्त्रालय नपाएपछि सिके राउत र रवि लामिछानेहरु जिल्लिएका छन् , यसले सिके र रवि जीहरु पनि सत्ताको लोभी र दोहोरो चरित्रको भएको पुष्टि भएको छ । यी दुइ दललाइ पनि बारा २ का जनताले सबक सिकाउने उनले बताए ।
एमाले अब सत्ताको लागि देउवा र प्रचण्डको पछि नलाग्ने उनले प्रष्ट पारे । एमाले अब जनताको माझमा गएर जनताको पिरमर्का बुझने र त्यसको सामधानका लागि सडकदेखि सदनसम्म सशक्त आवाज उठाउने उनले बताए ।
काँग्रेस, माओवादी र कथित मधेसवादी दलहरु गरिब , उत्पिडित र शोषित जनताको पक्षमा नभएको आरोप पनि बस्नेतले लगाए । उनले भने,‘ यी दलहरु सरकारमा पुग्ने बित्तिक्कै दलाल नोेकरशाही र पूजीपतिको पक्षमा काम गर्छन भन्ने पटक पटक पुष्टि भइसकेको छ , यिनीहरुबाट मधेसको विकास सम्भव छैन ।
राष्ट्रिय युवा संघ नेपालको पर्सा जिल्ला इन्चार्ज महम्मद निजामको अध्यक्षतामा भएको कार्यक्रममा एमाले केन्द्रिय सदस्य राज कुमार गुप्ता , जालिम मियाँ मन्सरी , संविधानसभा सदस्य विचारी यादव , एमाले जिल्ला संयोजक डाक्टर विश्वम्भर शर्मा , एमाले नगर सचिव सुन्दर कुर्मी , नेता श ीव पटेल , अकलेश साह , तेजप्रकाष निषाद लगायतको पनि सहभागिता थियो ।
The post एमाले नेता बस्नेत भन्छन् : नागको रुप धारण गरेर उपेन्द्र बारामा चुनाव लड्न आएका छन् appeared first on Madhes Khabar.
प्रतिक्रिया