मधेसखबर
वीरगन्ज,१९ माघ : जनता समाजवादी पार्टी (जसपा) का अध्यक्ष उपेन्द्र यादवले संघीय सरकारलाई दिएको समर्थन फिर्ता लिने चेतावनी दिएका छन् ।
बिहीबार वीरगन्जमा आयोजित पार्टीको जिल्ला स्तरीय अगुवा कार्यकर्ता भेटघाट कार्यक्रमलाई सम्बोधन गर्दै अध्यक्ष यादवले सरकारलाई दिएको समर्थन फिर्ता लिने चेतावनी दिएका हुन् ।सरकारमै रहेका दलहरुले संघीयता र समावेशीता जस्ता राजनीतिक उपलब्धी समाप्त गर्ने षडयन्त्र गरिरहेको भन्दै यादवले भने ,‘ यदि संघीयता र समावेशीता विरुद्ध सत्ताधारी दल र मन्त्रीहरु लागि रहे सरकारलाई दिएको समर्थन फिर्ता लिएर जसपा सडक संघर्षमा उत्रिन्छ । त्यसका लागि तयार रहन जसपाका नेता कार्यकर्ताहरुलाइ उनले निर्देशन पनि दिए ।
मधेस जनविद्रोहकै कारण मुलुकमा संघीयता , समावेशीता , मधेसीको पहिचान जस्ता राजनीतिक उपलब्धी प्राप्त भएका कारण यी उपलब्धी रक्षाका लागि जसपाले जस्तो सुकै कदम पनि चाल्न सक्ने उनले बताए ।
प्रधानमन्त्री पुष्पकमल दाहाल प्रचण्डलाई इतिहासकै लाचार प्रधानमन्त्रीको संज्ञा पनि यादवले दिए । उनले भने ,‘ सरकारमै रहेका दल र मन्त्रीहरुले संघीयता , समावेशीता र धर्मनिरपेक्षता खारेज गर्ने अभिव्यक्ति दिइरहेका छन् , तर प्रधानमन्त्री प्रचण्ड भने स्पष्टिकरण सोध्छु भनेर लाचारी प्रदर्शन गरिरहेका छन् , प्रधानमन्त्री भनेको त संविधान विरोधी अभिव्यक्ति दिने मन्त्रीलाई सिधै कारबाही गर्ने पो हो , स्पष्टिकरण सोध्छु भनेर लाचारी प्रदर्शन गर्नु होइन ।
प्रचण्ड जस्ता लाचार प्रधानमन्त्रीबाट देशको सुरक्षा र जनताको अधिकारको रक्षा हुन नसक्ने पनि यादवले बताए ।
प्रतिनिधीसभामा १२ सिट भएपनि राष्ट्रय राजनीतिमा जसपाको भूमीका महत्वपूण रहेको भन्ने नबिर्सिन उनले सत्तारुढ दललाई सेचत पनि गराए ।
संघीयता काँग्रेस र कम्युनिष्टहरुको मुद्धा कहिले पनि नरहेको भन्दै यादवले संघीयता समाप्त पार्ने साजिस(षडयन्त्र) विफल पार्न जसपा सचेत रहेको र आवश्यक परे फेरि आन्दोलनमा उत्रिन तयार रहेको बताए ।संघीयता , लोकतन्त्र र संविधान अहिले पनि खतरामा रहेको दोहोर्याउदै अध्यक्ष यादवले भने ,‘ विगत ३० वर्षको इतिहासमा संसदमा मधेसीको प्रतिनिधीत्व अहिले सबै भन्दा कम ( १६ प्रतिशत मात्र) छ , पहिलो संविधानसभामा ३४ प्रतिशत थियो , अहिले संसदमा संघीयता नचाहने शासकहरुको उपस्थिती ९८ प्रतिशत छ , त्यस कारण संघीयता , लोकतन्त्र र संविधान खतरामा छ ।
मंसिरको निर्वाचनमा देश भित्रकै आन्तरिक र देश बाहिरको बाह्य शक्तिको षडयन्त्रका बाबजुद पनि जसपा राष्ट्रिय दल बन्न सफल भएको जिकिर उनले गरे । उनले मंसिर ४ को निर्वाचनमा एमालेसंग तालमेल गर्ने जसपाको निर्णय सहि भएको पनि यादवले बताए । यादवले भने ,‘ काँग्रेसले गठबधनमा ९ सिट मात्रै दिएर जसपाको अस्तित्व नै नमोट पार्ने षडयन्त्रमा थियो , त्यहि थाहा पाएर एमालेसंग चुनावी तालमेल गर्यौ , जसका कारण हामी राष्ट्रय दल बन्न सफल भयौ , काँग्रेससंग गठबन्धन गरेका लोसपा र एकिकृत समाजवादी राष्ट्रिय दल पनि बन्न सकेनन् , हामीले पनि काँग्रेससंग गठबन्धन गरेको भए हाम्रो पनि हबिगत त्यहि हुन्थ्यो । त्यसका कारण एमालेसंगको चुनावी तालमेल गर्ने जसपाको निर्णय आज सहि साबित भएको तर्क उनले गरे ।
जसपाका जिल्ला अध्यक्ष रामनरेश यादवको अध्यक्षतामा भएको कार्यक्रमलाई पूर्व वनमन्त्रीं एंव सांसद प्रदीप यादव ,जसपाका केन्द्रिय सदस्य मधेस प्रदेशका पुर्व मुख्यमन्त्री लालबाबु राउत गद्धी , केन्द्रिय सदस्य एंव वीरगन्ज महानगरपालिकाका मेयर राजेशमान सिंह लगायतले पनि सम्बोधन गरेका थिए । कार्यक्रमको सहजीकरण जसपा पर्साका सचिव तबरेज अहमदले गरेका थिए ।
The post संघीयता रक्षाका लागि सरकारलाई दिएको समर्थन फिर्ता लिने उपेन्द्रको चेतावनी appeared first on Madhes Khabar.
प्रतिक्रिया