रितेश त्रिपाठी वीरगन्ज ३० वैशाख २०७९
बिहानदेखि पर्सामा शान्तिपूर्ण मतदान सुरु भएकोमा दिउँसो छिपहरमाई गाउँपलिकाको वाड नम्बर १ मिर्जापुर मतदानस्थलमा झडप भएको छ।
स्थानीयहरुका अनुसार त्यहाँ अवस्थालाई नियन्त्रण गर्न प्रहरीले करिब एक दर्जन राउण्ड हवाई फायर गर्नुपरेको छ। 'केहीबेर अवस्था तनावग्रस्त भएको थियो। स्थिती नियन्त्रणमा ल्याउन प्रहरीले केही रसाउण्ड हवाई फायर गर्नु परेको थियो, कति राउण्ड गोलि चल्यो भन्ने आउन बाकी छ,' पर्साका प्रहरी नायब उपरीक्षक ओमप्रकाश खनालले भने, 'अहिले स्थिती नियन्त्रणमा आइसकेको छ, मतदान पुनः सुचारु भएको छ।'
घटनामा ३ जनालाई चोटपटक लागेको स्थानीयले बताएका छन्। नेकपा एमालेका गाउँपालिका प्रमुखको उम्मेदवार मनोज गुप्ता र नेपाली काँग्रेसका उम्मेदवार नविन सिंहका समर्थकहरुबीच बिवाद सुरु भएर झडपको अवस्था बनेको स्थानीय अशोक कुशवाहाले बताए।
त्यसैगरी छिपहरमाई गाउँपलिका कै वार्ड नम्बर २ चेरगहाँ मतदानस्थलमा बिहान एक चरण बिवाद भएर शान्त भएको थियो। दिउँसो साढे १२ बजेदेखि त्यहाँ फेरी तनाव भएर झडपको अवस्था बनेको स्थानीयले जनाएका छन्। एमालेका उम्मेदवार गुप्ताले जनता समाजवादी पार्टी (जसपा)का समर्थकलाई हातपात गरेको आरोप जसपाका कार्यकर्ताले लगाएका छन्।
मतदान सुरु हुनु अगाडि रातिको अध्यारो मैं, बिहान साढे १ बजे जसपाका २ नम्बर वार्डका सदस्य उम्मेदवार धुरन्दर साह कानु र एमालेका उम्मेदवार गुप्ताबीच हात हालाहाल भएर कानुलाई चोटपटक लागेको र नाक फुटेको कुशवाहाले जानकारी दिए।
जिल्लामा रहेका १ सय ६७ मतदानस्थलमा शान्तिपुर्ण मतदान भइरहको बिहान प्रहरीले जनाएको थियो। दिउँसो जिल्लाको भारतसंग सिमा जोडिने, पश्चिम गाउँपालिका छिपहरमाईमा झडप भएपछि त्यहाँ प्रहरी सतर्कता बढाइएको छ। उक्त ठाउँलाई प्रहरीले संवेदनशिल क्षेत्रको सूचीमा राखेको थिएन।
सर्लाहीमा व्यापक तनाव: ३ ठाउँमा गोली चल्यो, मतदान अधिकृत कुटिए
मदन ठाकुर रौतहट ३० वैशाख २०७९
स्थानीय तहको चुनावमा सर्लाहीमा व्यापक तनाव देखिएको छ। गाउँ ठाउँमा मतदान अवरुद्ध हुने, सुचारु हुने तथा झडप हुने क्रम चलिरहेको छ। यसै क्रममा मतदातालाई नै सिकाएको आरोपमा एक जना मतदान अधिकृत कुटिएका छन्।
सर्लाहीको बलरा नगरपालिका ३ कृषि सेट मतदान केन्द्रमा मतदान अधिकृ राजकिशोर साहले मतदातालाई एक जना उम्मेदवारको चुनाव चिन्ह देखाएर मतदान गर्न सिकाएको भन्दै स्थानीय आक्रोशित बनेका छन्। आक्रोशित स्थानीयले मतदान अधिकृत साहलाई कुटपिट गरेका छन्। प्रहरीले मतदान अधिकृत साहलाई नियन्त्रणमा लिएको छ।
यसै गरी सर्लाहीको चक्रघटामा गोली चलेको छ। चक्रघटा गाउँपालिका १ शिवनगरमा रहेको रामनारायण प्रावि मतदान केन्द्रमा नेकपा माओवादी केन्द्र र जसपाका कार्यकर्ता बिच झडप भएको छ। स्थिति तनावग्रस्त भएपछि सुरक्षाकर्मीले गोली चलाएको हो।
रामनगर ४ बहुअर्वामा पनि गोली चलेको छ। धनकौल गाउँपालिकामा स्थिति नियन्त्रणमा आएको भए पनि मतदान सुचारु हुन सकेको छैन। व्यापक तनाव र विवादबिच सर्लाहीमा मतदान भइरहेको छ। अहिले सर्लाहीको धनकौलमा मतदान स्थगित छ। अन्यत्र सबै ठाउँमा मतदान सुचारु भइसकेको छ। धनकौलमा पनि मतदानको लागि पहल भइरहेको जिल्ला प्रहरी कार्यालय सर्लाहीका प्रमुख एसपि प्रवीण पोखरेलले जानकारी गराएका छन्।
प्रतिक्रिया